Hatangijwe amasomo ya Advanced Diploma mu by’indege na Logistics muri Kigali College

Umunyamabanga wa Leta muri Minisiteri y’Uburezi Claudette Irere, yayoboye umuhango wo gutangiza ku mugaragaro amasomo ya Advanced Diploma mu micungire y’indege n’ibibuga by’indege (Airline and Airport Management) ndetse n’imicungire y’uruhererekane rw’ibicuruzwa (Logistics and Supply Chain Management) muri Kigali College.

Aya masomo aje mu gihe u Rwanda rukomeje kwagura ishoramari mu bijyanye n’ubwikorezi bwo mu kirere, ubucuruzi n’ubukerarugendo, cyane cyane binyuze mu mishinga minini irimo iyubakwa ry’ikibuga cy’indege mpuzamahanga cya Bugesera. Ibi bikaba byaratumye hakenerwa cyane abakozi bafite ubumenyi bujyanye nizi nzego.