Mu rwego rwo kurushaho guteza imbere ubufatanye n’ubuhahirane hagati y’ibihugu byombi, u Rwanda na Antigua na Barbuda byasinyanye amasezerano yo gukuriraho viza ku baturage babyo.

Aya masezerano ateganya ko abafite pasiporo z’ubwoko bwose, zirimo izisanzwe, iza dipolomasi ndetse n’iz’akazi, bashobora kujya mu gihugu cy’undi badakeneye viza. Biteganyijwe ko ibi bizoroshya ingendo, binateze imbere ubukerarugendo, ishoramari n’ubufatanye mu by’ubukungu.

Iki cyemezo gifashwe mu gihe ibihugu byombi bikomeje gushaka uburyo bwo kwagura imibanire myiza ishingiye ku nyungu z’abaturage babyo.

Antigua na Barbuda ni kimwe mu bihugu bizwiho ubukerarugendo bushingiye ku nyanja nziza n’umuco wihariye. Umurwa mukuru wacyo ni St. John’s, ururimi rukoreshwa cyane ni Icyongereza, naho ifaranga ni idorari ry’Iburasirazuba bwa Karayibe (XCD). Iki gihugu cyabonye ubwigenge mu 1981 kivuye ku butegetsi bw’Abongereza.